မေ ၁၀ -၂၀၂၄
GG (VOM )
ထိုင်း – မြန်မာနယ်စပ်မြဝတီခရိုင်၊ ရွှေကုက္ကိုလ်က ကာစီနိုရုံတွေ၊ အွန်လိုင်းတရားမဝင်လောင်းကစား ဂိုဏ်းတွေကို ထိုင်းဘက်ကနေ တရားမဝင် ပေးထားတဲ့ ဖုန်းလိုင်းနဲ့ အင်တာနက်လိုင်းတွေကို မေလ ၉ ရက်နေ့ကစပြီး ဖြတ်တောက်လိုက်ပြီလို့ ထိုင်းအမျိုးသားအသံလွှင့်နှင့် ဆက်သွယ်ရေးကော်မရှင် (NBTC)က သတင်းထုတ်ပြန်ခဲ့ ပါတယ်။
” ရွှေကုက္ကိုလ်မြို့သစ်ဘက်မှာတော့ AIS-dtac-true ဆင်းကဒ် သုံးမျိုးရှိတဲ့ အနက် true ဆင်းကဒ်တစ်မျိုးကလွှဲပြီး ကျန်တဲ့ ဆင်းကဒ်တွေ အင်တာနက်သုံးလို့ မရတော့ဘူးသိရတယ်။ မနေ့ကစပြီး ထိုင်းအစိုးရကဖုန်းလိုင်းနဲ့အင်တာနက်လိုင်းစဖြတ်တယ် ” လို့ မြဝတီဒေသခံကပြောပါတယ်။
အဓိက ရွှေကုက္ကိုလ်က အွန်လိုင်းလိမ်လည်ဂိုဏ်းတွေ ၊ လူကုန်ကူးမှုတွေ လုပ်နေတဲ့ KK Park နေရာတွေကို ပေးထားတဲ့ အင်တာနက်နဲ့ ဖုန်းလိုင်းတွေကို ထိုင်းဘက်က ဖြတ်တောက်လိုက်တာဖြစ်တယ်လို့သိရပါတယ်။
” ရွှေကုက္ကိုလ်မှာက ကာစီနိုရုံတွေ၊အွန်လိုင်းလောင်းကစားဝိုင်း ကျားဖြန့်ပေါ့အဲ့ဒါတွေပဲရှိတာ၊ အဲဒီကိုလည်းဝင်ချင်တိုင်းဝင်လို့မရဘူး၊သူတို့လူပဲဝင်လို့ရတယ်၊ရွှေကုက္ကိုလ်မှာနေတဲ့သူဆိုဆိုရင်အထောက်အထားနဲ့ဝင်လို့ရတယ်ပေါ့။အခုလည်း အင်တာနက်နဲ့ဖုန်းလိုင်းတွေဖြတ်တယ်လို့ပဲကြားတာ၊သေချာတော့မသိရသေးဘူး၊ ရွှေကုက္ကိုလ်က တကယ်နယ်စပ်သောင်ရင်းမြစ်အစပ်ပဲ၊ မြဝတီမှာတော့ အခုထိ ထိုင်းလိုင်းတွေရနေသေးတယ် ” လို့ နောက်ထပ်ဒေသခံတယောက်ကပြောပါတယ်။
အမေရိကန်ပြည်ထောင်စု ငြိမ်းချမ်းရေးအင်စတီကျု USIP က ဧပြီလ ၂၂ ရက်မှာ ရွှေကုက္ကိုလ်မြို့ ကျားဖြန့်လုပ်ငန်းနဲ့ပတ်သက်တဲ့ အစီရင်ခံစာတစောင်ကိုထုတ်ပြန်ခဲ့ပါတယ်။
အဲဒီနောက်မှာ BGF ကလည်း မြဝတီဒေသတဝိုက်မှာ အွန်လိုင်းလုပ်လုပ်ကိုင်နေတဲ့နိုင်ငံခြာယသားတွေအားလုံး မေလ ၁ ရက်ကနေ အောက်တိုဘာလ ၃၁ ရက်အတွက်းထွက်သွားပေးဖို့ သတိပေးစာထုတ်ခဲ့ပါတယ်။
USIP အစီရင်ခံစာအပြီးမှာ BGF ကလည်းအွန်လိုင်းလောင်းကစားဝိုင်းတေွနဲ့ပတ်သက်လို့ သတိပေးမှုတွေထုတ်ခဲ့သလို အခုထိုင်းအစိုးရဘက်ကပါ အွန်လိုင်းငွေလိမ်ဂိုဏ်းတွေကို ဖုန်းလိုင်းနဲ့အင်တာနက်လိုင်းပေးတာတွေကိုဖြတ်တောက်လိုက်တာဖြစ်ပါတယ်။
USIP ရဲ့ ထုတ်ပြန် အစီရင်ခံ စာမှာတော့ ကရင်နယ်ခြားစောင့်တပ် (BGF) ခေါင်းဆောင် ဗိုလ်မှူးကြီး စောချစ်သူက တရုတ်နိုင်ငံသားများ လည်ပတ်နေတဲ့ ကျားဖြန့် ဂိုဏ်းေတွကို အဓိကပံ့ပိုးနေသူဖြစ်ပြီး ဗိုလ်မှူးကြီး စောချစ်သူ လက်အောက်ခံ ဗိုလ်မိုလ်သိုလ်နှင့် ဗိုလ်မှူး တင်ဝင်း လည်း ပါဝင်တယ်လို့ဖော်ပြထားပါတယ်။
ဗိုလ်မှူး စောချစ်သူဟာ ကျားဖြန့်လုပ်ငန်းတွေကနေကို တနှစ်အမေရိကန် ဒေါ်လာ ၁၉၂ သန်းရရှိပြီး လက်ရှိနစကကို ၅၀ ရာခိုင်နှုန်း ပေးရတယ်လို့ ဖော်ပြပါရှိခဲ့ပါတယ်။
ထိုင်းအစိုးရကတော့ ပြီးခဲ့တဲ့ ၂၀၂၂ ခုနှစ်၊ ဇွန်လ ၆ ရက်နေ့ကလည်း ထိုင်း−မြန်မာနယ်စပ်တလျှောက်က အွန်လိုင်းငွေလိမ်လုပ်ငန်း ၊ကာစီနိုလောင်းကစားရုံတွေ အများဆုံးရှိတဲ့ ရွှေကုက္ကိုလ်နဲ့ အင်ကြင်းမြိုင်စတဲ့ နေရာတွေကို လျှပ်စစ်မီးဖြတ်တောက်မှုရှိခဲ့ပါတယ်။
Photo – ထိုင်းသတင်းဌာန
